Puhpa LC. Chakhai,Chairman,MADC chhithana ry liata MADC Monsoon Session atyupakhyna cha atanoh liana chhao khata ahmâpazaopa a châ heih. Atanoh liata starred question 17 y ta, hiahrina nata âchhyna pie hmâ khaipa a châ . Hiahrina nata âchhyna alâluah viapa zy cha:-

Puhpa Tiahlei Syuhlo hiahrina, “MADC area liata khih moh nata chavah mohzy a origin moh dopa ta sopakhua lilawh khai awpa ta His Excellency,Governor of Mizoram nata Mizoram sawkhâ ta aparyhsapa cha khati daihti tawta hmâpathao awpa ma a châ?” tahpa cha “Mizoram sawkhâ ta notification liata papuapa châ ha ta, Mizoram Gazette liata papuapa a châ khai tawta hmâpathaopa a châ aw” tahpa ta Puhpa K.Hrahmo,LAD, EM cha ta â chhy.

Puhpa Pakhu Hlychho,MDC (MDF) hiahrina, “Middle School 26 liata pachutuhpazy Mizoram sawkhâ ta a lapakua lilaw ha penawhzy hriahlao cha MADC liata avaw tlôpazao lymâ ma” tahpa hiahrina cha, “ama moh chakhipa ta amo châta vaw tlôpazao khao vei” tahpa ta Puhpa N.Zakhai,EM,Education totuhpa ta â chhy.

Puhpa Nahlo Solo,MDC (MNF) hiahrina, “Sixth Schedule amendment bill 2015 draft copy MADC Sawkhâ ta ahmô hrama?” tahpa cha, Puhpa K.Hrahmo,House Leader ta a chhy ta, “ â thao tua no ta cha, MADC chhithatuh thokhazy phahnaingiana vâta un-official-ta hmôpa a châ, ahnolâ ta official ta hmô heihpa a châ” a ta.

Atakô January thla tawta Trade Licence cancell atahmâ 10th term MADC heta a hnei ma tahpa Puhpa K.Chiama, MDC (MDF) hiahrina cha Puhpa F.Lawmkima,EM,Revenue totuhpa cha ta a chhy ta , “Licence hneituhpazy ta chyhsa hropa nata pho hropa ama pahmâsapa zydua cha cancelled khaipapa a châ” a ta.

Mara Students Hostel sâno (Boys & Girls)tahmâ Aizawl liata sahaipa cha khatita sapatlôkhai awpa ma tahpa Puhpa Pakhu Hlychho,MDC (MDF) hiahrina cha Puhpa MH.Tiabi,EM,PWD ta kô 2017 July thla liata sapatlô khai awpa ta patotiana hneipa a châzie a chhy hra.
Puhpa Nahlo Solo,MDC (MNF) hiahrina,” Swach Bharat Mission hlaopatlosa nawpa ta MADC sawkhâ heta/Phusa a hmô ma?” tahpa cha MADC sawkhâ ta ahmô hra leina bie Puhpa.K.Hrahmo cha ta a chhy.

Atahmâ thlachhôh liata MADC area liata khi (5) liata VC by-Election hneina sôh kha ahyta âtô tahpa Puhpa K.Chiama,MDC (MDF) hiahrina cha Puhpa K.Hrahmo,house leader ta Mizoram sawkhâ ta â kaw tôpa a châzie bie a chhy heih hra.

Zalâ dawh (2-4:00 PM) liata private resolution sâkha Puhpa J.Rawna angiakheipa ta , “ Pala khih nata Tokalo khih likah he PMGSY sôh hmâpa ta Mizoram sawkhâ tlôkheipa châ sala” tahpa cha member nahzy ta pakhâta ta pachâ ei ta, hnypa a châ khai tawta Puhpa LC.Chakhai,Chairman,MADC chata daihti bitaipa yleipa ta Monsoon Session cha a pachhâsa.