SIAHA, 9 Nawh, Hriaheinoh(MNN) – Atanoh nohchhô dawh 12:00 Noon liana kha ta MADC ry liata Office ypa zydua pahlypa ta MADC Main Complex tlyhmia liata kô 2018 châta Pahypa Programme ahmâpa a châ.

Programme he Puhpa Pachi Hlychho, Secretary to the Disctrict Council(Legislative Secretariat) ta chhihtha ta, Rev. B. Beilua, ECM New Colony biatuhpa ta Devotion hneipa ta MADC ry liata rai hriapa zydua châta Khazohpa lâ byhnâ hiana thlahchhâna a hnei.

Puhpa N. Zakhai, CEM ta Biereina chyupa hneipa ta Staff zydua nata Mararâh zawpi zydua hnoh ta Kô thiehpa anaohna “Samaw” hlâna a hnei hra.

ECM College Vaih liata Loisy Singers(chanô group manôh 7) zy ta, hruapa ama châna hawh ta Hla sana hnei ei ta, Mara Gospel Singer Kalvary Krossngia Hlychho chhao hla ei no sana a hnei hra.

Kô parohpa liana kha ta MADC ry liata Department ypa Office zydua cha târi 23.12.2017 tawhta khawpa châta, târi 5.1.2018 liata kia pathaopa a châ. Pahyna Programme deikua atanoh liata hneipa a châ.

CEM Biereipa thokhazy:-

1. 2017 Christmas nata 2018 Kô thiehpa zy ziza pha kawpa nata apha kawpa ta eima hmâh chyu tahpa vaw pahno na ta, ei ly ngaita kaw; he zydua vâta eima Khazohpa lâ alyna bie ei reih.

2. Atakô 2018 tawhta Pathaihna he pachâ peimawh chyupa ta eima O nata Office chhôh apathaih kawpa hawh ta eima O chheipâh nata khiliah pathaina kyh liata tiama papua via lymâ sih la; ahyrai ta hnaihny, apuapa nata pa-ôpazy taonazy thy chakhyh lei awpa apachhuah chyu suh vy.

3. Council za leipa hawh ta hmoto liata Council maochhiena ahluh kaw. He he chi hro pho hropazy pakah tawhta apuapa reikah châ leipa ta keimo Marasaw pakah tawhta apuapa a châ khia, apei ngaita kaw aw. Political Party eima reipachhie hapa chhao ta Council he cha Khazohpa ta eima missionary nahzy siepahliepa ta maniah a piepa a châpa ta eima pahno chyupa hawh ta reipachhie leipa ta kyhpachâ ei suh u.

4. MADC Staff zy ta Office kiana kyh liata Marapa tha pasana palâsa ei suh u. Thapi phia via ta, eimâ pie pasa via hleikhô ta hriapasa via ta eima tiama via ei awpa apeimawh tahpa pahno heih ei suh u.

5. MADC he Mara chipho eihrâhpa eima châ vâta ahnei theipa eima châna hawh ta MADC office liata Mara reih pasâhsa ei suh u. Mara reih athai leipa eima y pathlei khia atakô tawhta la hmâ thei cheingei awpa ta achu ei suh u.

6. Reingiana he pachâ peimawh ei suh u. Reingiana liata ato â chalih. Hlâta alai viapa, asâh viapa nata eima chô liata ypazy rei angiah ei suh u.

7. Kô 2018 pa he Kô khochhihpa, kô nohhlaopa avaw châ theina awpa ta Abeipa ta byhnâ maniah pie chyu mawh sy.

(Admin, MNN).