Siaha: Council vaih, Siaha liata Multipurpose Community Hall cha dt. 3.6.2015 (Pakhy noh) khata Puhpa RT. Zachônô, Chief Executive Member, MADC ta a pahy. He Hall pahyna liana heta Puhpa N. Chakhai, Addl. D.C, Siaha ta programme chhitha pata Rev. Chhuakhu Khithie ta Devotion a hma. Puhpa VL. Hruaizela Khiangte, PD (DRDA) ta Technical report pie ta, he Hall sa nawpa cha heta chyhsa – 6 rah chaleipa cha ta, kô 2009 tawhta sapathaopa cha ta, BRGF phusa tawhta Rs. 190 lakhs hryupata sapa a cha. A chhô lia he Badminton Double Court a tlô ta, Mizoram chhô liata Badminton Court pha chaipa hry liata ahlao pha pa a cha. Puhpa RT. Zachono, CEM, MADC ta bie reihna hneita, “He hawpa Hall phapa pahy thei awpa ta avaw ypa he Council vaih deih chalaipata Siaha khi liata pahrapa zawpi zy chata byhna cha ta, aviapachaipa ta Council vaih zawpi zyta nama pasô thai awpa a cha. Sports (Badminton) liata apaha pa zy ta apaly pauahsa nawpa ta vaw hma ei ta, vaih hrola, khi hrola tawhta a khai awpa ta zawpi avy pakhy eita, vaihchhô lia phusa varohpi vawngia ta, vaichhô zawpi zy chata hmasiehna a cha aw tahpa he khacha ei hnabeiseih. Council vaih zawpi zy chhaota pua pakhy nawpa ta zy, meeting hnei nawpa ta zy ama vaw hma phahnai nata eipangiasa” tahpa ta a reih.

Puhpa KH. Beihlo, EM (Forest) Council vaih Biahtuhpa chhaota bietahna reih hrata, “He Hall sa nawpa liana heta eima hyutuhpenawhzy, sawkha lata biehneituhpazy la liata Hall eima peimawhna eima tlôkheipazy a hlaotlohna eima vaw hmô theipa he eily ngaita. Thyutlia, paritheipa seih liata atah ngah haipa zyta eima hmoh tao phaleipa zy thy/basaipata he Hall liana heta Badminton zy akhai tyh awpa ta ei cha hrua ei. He Hall heta sapa hri-iah pathaina lia chhaota hmasiehna varohpi maniah a tlôkhei nata ei hnabeiseih” tahpa ta a reih hra. Hla sa thaipa Puhpa John Beizachhi Phuto, Ls. Chhingpuii Azyu, Ls. Jessica B. Khuhly nata Ls. Rochansangi zyta zawpi ama palô pahaw. CEM he Puhpa MH. Tiabi, EM (PWD), Puhpa K. Chhuabei, EM (RD), Puhpa KH. Beihlô, EM (Forest), Puhpa V. VB. Byhna, EM (Soil), Puhpa K. Chhihrau, DCAO, Pihno S.Lalmuanpuii, DVO zyta ama chaku chavei.