(TIPA, 3 Hmypi, 2019, Pakhynoh)

Azâhnia dawh 2:30 Pm liata Chief Guest Puhpa H. Sahlô, Chairman, MADC ta MADC Sub-Headquarters: Divisional Administrative Officer (DAO) Office, Tipa khih liatahpa cha Marasawzy châta Byhnâ tona nata Byhnâ hmôna su châ awpa ta khokheina sâh chaipa hlâna chô ta aly kawpa ta a pahy haw.

He office chhôh liata Conference Hall taopa liata pahyna programme ahmâpa châ ta, Puhpa P. Tluasa, EE(PWD), MADC ta programme a chhihtha. Rev. F. Vanlaldika, ECM Tipa Pastor Bia biatuhpa ta Devotion hneipa ta, building thiehpa Khazohpa lâ pavaosana a hnei.

Puhpa K. Siakhai, Adviser to CEM ta Welcome Speech reina hnei ta, Puhpa K. Hlôsa, AE, PWD, MADC tawhta Technical Report nahthliepa a châ hra.

Chief Guest ta biereina a hnei khai tawhta Puhpa K. Chhuabei, EM i/c PWD nata Puhpa F. Lawmkima, EM i/c Forest etc. zy ta biereina chyupa ama hnei chyu hra.

Daihti chhâna lâ liata Puhpa HC. Lalawmpuia, DAO, Tipâ ta Vote of Thanks reina hnei ta, DAO office pahyna liata avaw hlao theipa zydua hnoh ta MADC, Tipa vyuhpa ta alynabie reina a hnei.

Puhpa John Beizachhi Phuto nata Jasmine Ropahâ, Tipa Junior Idol 2018 zy ta zawpi avypazy palyupalihpa ta hlasana ei 2 chyu ama hnei hra.

He pahyna Programme liata khihchhôh nôpawpazy puapha kaw ei ta, ary liata palâsapazy he hruapa ama châna hawh ta pachâpeimawhpa ta Siaha tawhta azâ hlao theipazy ama châ:-

MADC Nôpawpazy:-

  1. Puhpa H. Sahlô, Chairman
  2. Puhpa F. Lawmkima, EM i/c Forest etc.
  3. Puhpa K. Chhuabei, EM i/c PWD etc.
  4. Puhpa L. Prisila, EM i/c Soil etc.
  5. Puhpa K. Siakhai, Adviser to CEM.
  6. Puhpa H. Hranchuanga, Dy. Chief Whip.
  7. Puhpa Pasa T. Azyu, MDC
  8. Pihnô Ngunsuii.

MADC Officer zy:-

  1. Puhpa V. Zacho, Executive Secretary
  2. Puhpa P. Tluasa, EE, PWD
  3. Puhpa P. Sama, Secretary(Leg.)
  4. Puhpa K. Hlôsa, AE, PWD
  5. Puhpa BeiRôkhu Beitâ I & TO

He nahzy hleikhô ta PWD Staff nata I & P Staff thokhazy ama sie thei hra.

He DAO Office Building he 13th Finance Commission sôh tawhta Rs.150/- Lakhs nata NITI AYOG sôh tawhta Rs.40/- Lakhs hmâpa ta sapa châ ta, kô 2012 liata sa pathaopa châ ta, kô 2018 liata sa patlôpa a châ. Contractor he Puhpa K. Beiparylai a châ tahpa Technical Report ta a palâsa.

Building duahmo:-

  1. A chhâh(Floor) ypa zie = 3
  2. Officers room = 7
  3. Staff room = 7
  4. PA room = 2
  5. Toilet = 4
  6. Urinal = 9
  7. Conference Hall = 1

Puhpa H. Sahlô, Chief Guest biereipa thokhazy:-

  1. Atanoh liata he hawh ta Tipa liata DAO Office pahy theipa avaw châpa he aly ngaita na ta, pahy thei awpa ta hmah ala tuhpa zydua chô liata alynabie ei reih.
  2. Khazohpa ngiachhiena nata eima nôpaw hmiatuapazy tiamana nata hriapasana zawhzi ta keima Chairman ei châ chhôh(11th Term MADC, 2017-2022) liata CEM Bungalow, Boys & Girls Hostel-Aizawl, Land & Revenue Administrative Building –Siaha zy pahy hapa vaw châ ta, atahmâ he Agriculture Department Administrative Building nata MDC Hostel, Siahatlâh liatahpazy sa ngâhaipa châ heih ta, vâhnei ei tah hmeiseih. Râh zawpizy nama thlahchhâkheina vâta a châ.
  3. Zawpi nata râh-luhpa châta atlypatlohpazy hriaparaoh-na phapa he sawhkhâ thatlôna a châna hawh ta arâ leilô zawpizy pi ta sawhkhâ nata eima hriaparaoh awpa he peimawh ngaita ta, sawhkhâ tawhta bie puapazy he apha kawpa ta eima zyh awpa he eima mo pakha chyu maohphaohna a châ.
  4. Atanoh, he Office eima pahy hapa liata Adona, Siana, Ngâchhihna hneina chô ta, he liata hriatuhpazy khokheina ei cha hlâ ei.
  5. Khazohpa thlahpa pathaihpa ta ahrialâhkhohpa chyhsa nata Office zy avaw châ cheingei theina awpa ta ahriatuhpazy pi ta eima rai chyu liata ngâchhih si la, Office kia daihti nata office tawhta adi daihti taihpa patlô chyu awpa ta ei châ haw ei.
  6. He Opi he nieparu doparuna châ leipa ta, Marasawzy byhnâ tona su nata byhnâ hmôna su vaw châ sala tahpa khokheina ei cha hlâ ei.
  7. MADC Sub-Headquarters: Tipa he Officer nata Staff hluhpi so khoh kaw tyh hra ei si la, atahmâ taih ta eima hneipa Office O he chyhsa eimâ tlôh hluh thei lei vâta ataona awpa lâpi y tyh vei. Atahmâ tawh deikua cha building lai kawpa, raihriatuhpazy atlôh hluh awpa eima hneiha bâ vâta MADC Administrative Reforms Commission(ARC) recommendation hawh ta Tipa lia chhao Officer hluh via so laih awpa ta hmah eima la laih awpa kyh liata thathyu âchhih kawpa ta ei pahno.

Puhpa K. Chhuabei bie reipa thokhazy:-

  1. He DAO Office building pha kawpa eima vaw hnei theina awpa ta All VCs, All NGOs, Contractor, tha nata zâh ahmâtuhpa zydua hnoh ta alynabie ei reih.
  2. Tipa DAO, Officers nata Staff zy hnoh ta alynabie ei reih.
  3. Atahmâno he eima râ liata Mara reih pasâhsa ta cheih chalo lymâna kyh liata hmah lana thata y ta, Mara reih hmah pasiesa lymâ awpa khona a lai kaw tahpa eima pahno chyu.
  4. DAO Office pahy noh tawhta Tipa khih nata achheipâh zydua liata nata he office avaw daohtuhpazy ta Mara reih pasâhsa ta pabohsana kyh liata tiama papua chyu awpa ta ahaw pi ta, Mara athai pasia leipazy ta a chu lymâ awpa ta ei châ haw ei.
  5. MADC Officers nata Staff thokhazy, Tipa liata Post awpa he amâ ngiaroh kaw tyh tahpa pahnopa châ ta, apei ngaita kaw. He kyh liata eima pachâna he apasoh viapa ta hmâh sih la, kheihawh su lia rai, sawhkhâ rai eima hriapa hawh ta eima nôpaw nahzy ta eima yna awpa su maniah ama tahpa mai liata aly kawpa ta eima hria lymâ awpa he sawhkhâ rai hriapazy eimâ pasyu khoh kaw.
  6. Eima Mararâh liata Politician nahzy, Pastor zy, sawhkhâ rai hriapazy nata ku raihriapazy pi ta eima rai chyu liata pahâh kawpa ta rai hria chyu ei suh u; cha cha eima râh hmahsiena awpa nata Khazohpa khozie chhao a châ.
  7. PWD Portfolio atotuhpa ei châna hawh ta he Pahyna liata avaw hlaopa zydua hnoh ta palô hmeiseihpa ta alynabie ei cha hlâ chyu ei.

Puhpa F. Lawmkima biereipa thokhazy:-

  1. DAO Office sa patlô theipa a châ vâta Puhpa K. Chhuabei, EM i/c PWD nata PWD ry liata Officer nata Staff zy hnoh ta, ei bia zawpi vyuhpa ta alynabie ei reih.
  2. Kô 1972 liata Autonomy biehneina eima vaw hnei tawhta Tipa liata Sub-Headquarters vaw ypa ta building sapa cha atanoh taihta tlôpa vaw châ ta, atahmâ he hawh ta building thiehpa liata tlôpa ta â tluatlâ kaw bâ awpa he a bia zawpizy pi ta eimâ ly kaw.
  3. He Office liata hriatuhpazy pi ta, zawpi zawhzi ta sawhkhâ rai hria theipa eima châna hawh ta maniah adaohtuhpazy daodo kawpa ta nata apanawh lymâ ei suh u. He hrozie phapa he Peon tawhta Officer lai chaipa taih ta pahno chanei heih ei suh u.
  4. Office thiehpa eima pahy ha bâ tawhta cha he office liata hriatuhpazy ta eima vyuhpa ta ahy hmahta pahriasa tlâ khao lei awpa a châ aw. Ahria hoh leipa cha volunteer pension zy hiah ei sala, eima râh châta apha via cheingei aw.
  5. Zawpi, he office adaohtuhpazy chhao ta, rairuna eima hnei khia biehneituhpa lâ tlôkhei lymâ ei suh u.
  6. Office rai hriapazy ta kia daihti nata adi daihti adawh taihpa paki cheingei achhuah chyu awpa ta ei châ haw ei.
  7. He Office châta hmo peimawhpa hluhpi avaw y laih aw; eima nôpawzy lâ ta eima vaw tlôkhei ei ta, Tipa Sub-Headquarters he maniah pachâ peimawh awpa chhao ta ei châ haw hra ei.

Tipa DAO Office he PWD, MADC mohôh-na ry liata sapa châ ta, atahmâ cha sapatlôpa a châ hleikhô ta pahy hapa a châ vâta atahmâ tawhta cha GAD lâ hlâpa châ aw ta, GAD ta room allotment vaw tao aw ei ta, atlôhtuhpa Department zy ta ama Office Expenditure(OE) chyu tawhta ama peimawhpa Office Furnitures & Materials zy amâ chalei chyu aw. Ama phusâ ta âpha leina lâ cha GAD siepahliepa ta Executive lâ tlôkheipa châ aw ta, abyuh-na nata ângiah-na hawh ta mopazi lymâ awpa a châ aw.

Atanoh, he DAO Building pahyna liata Tipâ liata Mizoram sawhkhâ ry liata HOD zydua hruapa ama châna hawh ta puapha kaw ei ta, Puhpa HC. Lalawmpuia, DAO, Tipa ta ama chô liata alynabie a reih hra.

Programme chhâ tawhta DAO Quarters liata alyna kyhchhi pati dôh-na hnei pâpa a châ hra.

(Written by BeiRôkhu Beitâ, I & TO, MADC, Siaha).

No comments yet... Be the first to leave a reply!

Leave a Reply

You must be logged in to post a comment.