SIAHA, 18 Thlarâh (September), Hriaheinoh, 2018 (I & P, MADC) – New Colony-II ôna chhôh liata Siaha District Employment Office Road cha atamy dawh 7:30 Am liata Puhpa K. Chhuabei, EM i/c PWD, MADC ta Siaha khihchhôh zawpi nata Mararâh zawpi ta phahnaih kawpa ta ama hmâ awpa ta a pahy.

He lâpi pahyna daihti chyupa he Puhpa H. Sangluaia, VCP, New Colony-II ta chhihtha ta, lâpi ama vaw tao a dâh tlâhpipa report a pie pâ.

He lâpi he Siaha zawpi vâtlâh châta asiepahliena lâpi peimawh kawpa châ ta, daihti vâro tlai mohôh pazi leipa ta a y vâta rao kaw bâ ta, kheihawhpa ahluah theipa chi rai châta sie rairupa nata chichhih kawpa a châ vâta New Colony VC zy he ta MADC liata biehneituhpazy hnoh ta tlôkheipa a châ.

MADC liata PWD nata LAD zy ta he lâpi taopathina châta sôh Rs.3,35,000/- thyupakhypa ta thla hmiatuapa Thlazoh thla thaona tawhta rai hria pathaopa a châ.

Mizoram PWD tawhta lâpi taona chhaichhi(Road Roller etc.) vaw thyu hra ei ta, New Colony – II zawpi ta ei khazie leichâma tlâhrai ama hria hleikhô ta hlawhfâh zy lapa ta he hawh ta apha kawpa ta tao patlô heih theipa avaw châ.

He lâpi he Meter 67 seihpa châ ta, a kawhna lâ he Meter 4 a châ. Retaining Wall pha kawpa su palih liata taopa châ ta, New Colony – II VC zy ta Work Agency ama châna hawh ta nohchareih ta raihria ama chahlô cha-ei tyh.

Lâpi a pahy khai tawhta Puhpa Chhuabei he MADC PWD sôh hmâpa ta New Siaha West liata Retaining Wall ama tao ngâhaipa cha asu tlypâpa ta raihria siekhei ngâhaipa mopasiana a hnei.

He Retaining Wall taona liata Rs.30 Lakhs hlei hmâ hapa châ ta, Meter 120 seih ta, â sâhna lâ Meter 4 a châ.

He Retaining Wall he alei cho awpa vaihtuhpa dei châ leipa ta Siaha khihpi lâthlôh buah kawpa avaw kawh viana awpa châta pachâpa ta taopa châ ta, âvaw ryhpaohpa ta a châ khiah Motor Parking châta hmâpâ awpa a châ aw.

Puhpa Chhuabei he Puhpa P. Tluasa, EE (PWD) nata Staff zy ta ama zi hra.

Issued by:
Information & Publicity Department
MADC, Siaha.