PHURÂ, 9 Hmyhpi, Chutynoh(MNN) – Zâhnia my dawh 8:30 Am pa liara Phurâ – Lôpu lâpi 29.5 Kms ta apahsipa, PMGSY sôh hmâpa ta chhia/chao awpa cha Puhpa K. Chhuabei, EM i/c PWD etc. MADC ta ribbon chakiepa ta a pahy haw.

He lâthlôh chao awpa ta pahyna programme he puhpa M. Rachu, VCP, Lopu- 1 ta chhitha ta, Lopu ECM Awnano hyutuhpa ta thlahchhâna a hneikhai tawhta contractor zy vyhpa ta Puhpa KC. Ngôbei ta beireina hneita, chakhai tawhta Puhpa Zualtea, EE, PWD, Siaha division ta biereina a hnei pazao hra.

He lâthlôh pahyna programme liana heta PWD lâta officials nata Lôpu khih chyhsa zy amâ hlaopha kaw.

Puhpa Chhuabei, khichhailaipa chata biereina hnei ta, “Tanoh ta PMGSY siepahliepa ta Phurâ – Lopu lâthlôh thiehpa eima hnei awpa he Mararâh nata apachaipa ta he lâthlôh ta a chapiapa zy châta ryu sôh ngaitapa nata hmahsiena maniah tlôkheituhpa a châ nahta khâ eihnabei â seih.”

“Anodeikua cha he lâthlôh chapiapa khih liata pahrâpazy ta a phahnaina zieta hmâ thei awpa ta eimâ chhuanoh awpa ângiah ngaita kaw.”

“Lâthlôh aphapa ta chaopa achâ thei n’awpa ta contractor zy, khaw operator nahzy nata department chyhsa zy eima deichhy thai ngaita awpa abyuh.”

“Hmo phapa nata adaih parei awpa eima khoh khiatala keimo chhao maophaona lai ngaitapa eima hnei tahpa kha eimâ thei ngâthlâh awpa a châ.”

“Chahawna hra chata contractor nata khaw operator nahzy chhaota khitlâh amohôhna nata khisawzy zo nama mo thai hra awpa a châ.”

“He lâthlôh aphapa ta saopi atla hlâta patlô thei awpa ta theina zydua papua chyu awpa ta zawpi apuapakhypa zy a hrua ei.”

Lâthlôh thiehpa alyna kychhi cha khitlâh zydua ta dôkhohpa a châ.

He lâthlôh pahyna programme liata zawpi apua pakhypa zy laihsa Pawti Azyu ta hla sapa ta a palôhpahawh ei. Khichhailaipa he Puhpa S. Vabeihasa, I & PO, Puhpa T. Pabua, Cameraman nata laihsa Pawti Azyu zy ta ama chaku-chavei.

(Written by: Puhpa S. Vabeihasa, I & PO. Edited by BeiRôkhu Beita, AITO, MADC).