Siaha, October 01, 2018 (Monday): Atanoh my 10:00AM pa ta Puhpa K.Vanlalliana, DCEO, MADC cha Chief Guest châpa ta Hindi Teacher/Pracharak Orientation Programme opening ceremony ahmâkhei ei.

*Biepipa* “Hindi Padho” “AAGE Badho” tahpa hmâpa ta Central Institute of Hindi, Regional Centre, Shillong tawhta Hindi Teacher/Pracharak Orientation Programme (Hindi Orientation Refresher Course) cha October 01, 2018 to October 11, 2018 taih hnei awpah ta Dr. Vijendra, Regional Director, Central Institute of Hindi, Shillong Centre nata a hrialâhpazy ta he Training he ama pie aw.

He Orientation Programme Opening Ceremony hneina lia heta Khichhai laipa (Chief Guest) Puhpa K.Vanlalliana, DCEO, MADC ta Hindi thai peimawh ziezy reih ta, Siaha District chhôh liata apahrâpa chyhsazy Hindi eima thai khai awpah a peimawh zie a reih. He training na lia heta Hindi Teacher nahzy Hindi liata pahnothai leipa nata rairuna ahneipazy kâchhie leipa ta resource person zy hiahri lymâ awpah ta a chho ei.

Dr. Vijendra Singh, Regional Director, Central Institute of Hindi, Shillong Centre chhao he programme lia heta biereina hnei hra ta, cha liata a biereipa cha MADC Area chhôh liata apahrâpa zawpizy Hindi reih eima thai awpah a peimawh zie a reih. Official hmo peimawh kawpa adaoh awpah ta Delhi lâ zu ula, Hindi nama thai vei khiahta la cha vaw papeimawhsa tu lei p’aw ei ta, Hindi nama thai khiahta la India ti nata râh eima châna zie a lâ via ta, chahnaihta Hindi he eima papeimawhsa awpah he a peimawh hmeiseih tahpa ta a reih.

Mawrâh khôtho lâ nama pua tita Hindi nama thai khiah Rai (Job) chhao arai nao kawpa ta nama hmô thei lymâ aw, atahmâ tawhta la Hindi thai achhuah chyu ei suh vy tahpa ta zawpi he programme liata avaw hlaopazy hnohta bietana a hnei.