SIAHA, 18 Phiata, Pobienoh (MNN) – Atamy dawh 11:00 Am liata Puhpa K. Vanlalliana, DCEO, MADC ta “Training for Caretakers of CCIS, Siaha District on Child Development” Programme a hmâkhei.

He Training Programme he DPCU Conference Hall, Vaihpi-I liata hneipa châ ta, Training Programme pathao hlâta Chief Guest Puhpa K. Vanllalliana bierei awpa ta hruapa châ ta, ary liatahpazy he a bierei tlâhpi viapazy a châ:-

1. Eima khizaw hmahsiena vâta hmo thiehpa hluhpi vaw pua laih ta, eima Society nata hawtizy châta hmophapa nata phaleipa apachutuhpa keimo Caretaker zy pi ta eima pahrua thai awpa apeimawh kaw.

2. He hawhta a châ vâta Caretaker zy he Training piepha awpa eimâ ngâsâpa a châ.

3. Atahmâhlâ hmothiehpazy hawh ta eima pahnonazy chhao eimâ pathieh lymâ hra awpa abyuh vâta chahawhta apachu pahriana Training he papeimawhsa awpa a châ.

4. Training he Practical ta tao pazi leipa ta a châ khia eimâ Training tyhpazy he yzie hneileipa a châ aw; chavâta practical ta tao pazi eimâ chhuah awpa a châ.

5. Keimo Home amohôhtuhpazy pi ta nôphana nata areisina hneina chô ta hawtizy mohôhna rai eima hria awpa a châ.

6. Chyhsa ry adaoh theina nata areisina zy chhao he hnei awpa apeimawh ngaita.

7. Eima rai hriapazy he, Khazohpa bie(1 Kawrini mozy 6:3) liata eima hmôpa hawh ta seina nata reipachhiena hneipa ta a y leina awpa ta phahnaih eimâ ngiah ngaita awpa a châ.

8. Sôh kyh nata hawti mohôhna kyh liata Reipachhiepa ta eima y daihti liata ‘apha baona’ tahpa ta phahnaih ngiah kawpa ta rai eima hria tyhpazy kha siesai tlamaw lei awpa ta ei chakhokhei ei.

9. India râh su nano nanopa liata NGO nah zy reipachhie ahlaopa hawh ta eima râh liata cha reipachhiena atyh hryuh mâh lei pi ta, aly’pa a châ kaw. He hawh ta achâ no ta, ei kha thâchhie ahlao hapazy he mohphana hlao heihna awpa arairu kaw aw. Chavâta asohsi awpa apeimawh hmeiseih.

10. Ato zydua he Khazohpa ryhraona hawh sai a châ tyh tahpa pahno si la, Khazohpa liata apahniehpa ta, eima saw hmeiseihpa mohôhpa hlâta Home liata hawti nawh zy he mohôh pha angiahpa ama châna hawh ta tiama papuapa ta, Home paduapa hlao patlohtuhpa nata phahnai ngiah kawpa ta chakaona rai hriatuhpa châ chyu awpa ta khokheina sâh chaipa ei cha hlâ ei.

11. Atanoh Training he apalâ kawpa ta nama hmâ theina awpa ta khokheina cha hlâ ei na ta, athôhkhei cheingei achhuah chyu awpa ta ei châ haw hra ei. Ei châly kaw ei.

Eima râh liata Home ypa, sawhkhâ tawhta baona ahmôpa eima pahnotheipazy:-

1. Grace Children Home(GCH), College Vaih, Siaha.
2. Siaha Child Adoption Center(GCH), College Vaih, Siaha.
3. Charity Home, Saikao.
4. Ebenezer Children Home, New Colony, Siaha.
5. Observation Home, New Siaha.
6. Orphanage Boy’s Home, ECM Vaih, Siaha.

Atanoh liata Training he District Child Protection Unit nata Management Committee, Grance Children Home zy apakaohpa ta pachhuahpanohpa châ ta, District Mental Health Programme tawhta Puhpa Lalchhanhima Sailo ta Resource person châpa ta Caretaker zy pachuna(Training) a pie ei.

Training pathao hlâ liata Programme he Puhpa Lungmuana Hrahu, Member, GCH, HMC ta chhihta ta, Pihnô Siavaw Thlana, Chairman, GCH Managing Board, ECM KNP HQ ta Devotion a hnei hra.

He Training he hawti mohôhtuhpa, a eihpachaipa ta sawhkhâ pahnokheipa Home zy liata hriatuhpazy châta pachhuahpanohpa châ ta, athôhkheina hnei awpa ta hnabeiseihpa a châ.

(Admin, MNN).

No comments yet... Be the first to leave a reply!

Leave a Reply

You must be logged in to post a comment.