(10 Thlazoh, 2018, Chutynoh)

Atanoh dawh 1:00 PM kha ta Puhpa N. Zakhai, CEM, MADC chata Siaha liata National Health Mission, Health & Family Welfare Department, Government of Mizoram pachhuahpanohpa Launching on National Deworming Day Programme a hmâkhei ei.

Puhpa N. Zakhai biereipa thokhazy:-

Kô 2015 tawhta hmah la pathaopa National Deworming Day he India sawhkhâ phana zawhzi ta chyhsa hluhpi ta athôhkhei ha pi ta, Mizoram liata District chaki chaipa, eima District lia chhao he hawh ta Programme pha kawpa eima hmâ theipa he ly âchhih tah na ta, Khazohpa ngiachhiena vâta a châ tah leithei vana.

World Health Organisation(WHO) chata Soil-Transmitted Helminths (STH) chhôhchhie he khizaw pôpalôhpa liata infection a hluh chaipaw hawh ta palâsa ta, chyhsa rih chhôh liata pahrâpa ta chyhsapa châta pati phapa maih avaw nie ha tyh. He hawhta chichhihpa chhôhchhie he hawhti zy ta ama vaw hnei leina awpa ta India sawhkhâ cha ta thata hmah vaw la ta, zâhkô 2017 tawh chhochhi kha cha Ministry of Health and Family Welfare chata Sawhkhâ School lia ngâlâh châkhao leipa ta, Private School lia zy chhao ta chhôhchhie thohna he asaipa ta a vaw rai haw.

Keimo zawpi, Health Worker , ASA liata hriapazy, a eih pachaipa ta hawti zy he ta Sawhkhâ hmah lana nata biepiepazy he zyh lymâpa ta hlao eima patloh lymâ awpa he apeimawh ngaita. Khazohpa he ta sawhkhâ siepahliepa ta eima phana awpa sai ta maniah pachâpa ta, sawhkhâ cha ahy chama a châ tahpazy chhao eima pahno pasia awpa apeimawh kaw aw.

Japan râh liata Japanese chapaw pakha nata Foreigner pakha he Catch & Release Fishing Pond liata keipa pathliahpa ta ngasa thata patu ei ta, Foreigner chata ama ngasa patupa cha ahy hmahta hmô tlôh leipa aw ei ta, O lâ adikhei achhuah ta. Anodeikua sawhkhâ ta O lâ adikhei pasaih vei tahpa Japanese paw chata Foreigner a chhôh ngâ tarawna chô chhao ta Sawhkhâ ta maniah hmô vei hi, eimâ dikhei awpa a châ khâcharâ tah ha ta. Japanese paw deikua chata kei he sawhkhâ ei châ tah ta. Chatawh cha Foreigner paw cha ta ngasa cha tipo lâ a pathlie lilaw hapa a châ.

Sawhkhâ cha zawpi he châ pi ta, zawpi he sawhkha cha eima châ pyly. Chatanachata sawhkhâ cha keima he ei châ tahpa eima sia awpa apeimawh ngaita kaw.

Atanoh liata National Deworming Day Programme hmâ awpa ta avypa zydua, sawhkhâ bie zyh khai awpa ta bie chata khoh ei na ta, chhôhchhie thohna chhao apha kawpa ta nie lymâ awpa nata nie awpa ta chho pachhuah lymâpa ta, hnatlâna phapa hnei lymâ awpa ta khokheisa sâh chaipa ei cha hlâ ei.

(Written by Beirôkhu Beita, AITO, MADC).

No comments yet... Be the first to leave a reply!

Leave a Reply

You must be logged in to post a comment.