(SAIKAO, 6 Phiata, 2018, Pachynoh)

Atanoh my dawh 11:00 Am liata Puhpa N. Zakhai, CEM, MADC ta Mara râh liata Gov’t Primary School(PS) hmiatua chaipa Gov’t Primary School, Saikao kô 70 a tlohna Platinum Jubilee lôbô pahyna a hnei.

Lôbô Pahyna Programme hmâkhaipa a châ tawhta Puhpa K. Hrahmô, EM i/c Education etc., MADC, Siaha ta School Building thiehpa pahyna a hnei hra.

He khai tawhta School Building thiehpa chhôh liata Platinum Jubilee nata Building thiehpa Alyna Programme hmâ pazipa châ ta, alyna programme liana he ta Saikao khihsawzy ama puapha kaw.

Programme he Pihnô N.T. Roddy, Headmistress, Gov’t Primary School, Saikao ta chhihtha ta, daihti thaona lâ liata Rev. AZ. Beirakaw, AGS, CCI(M) ta Biehrai Bu Ryhpachaneina 20:5 tawhta Khazohpa bie reipakawhna chyupa hneipa ta Devotion a hmâh.

Revd. JR. Sanga ta Platinum Jubilee atheithlâhna Souvenir palâhâhna hnei ta, presentation daihti a hmâh hra.

Puhpa N. Zakhai, Chief Guest Bierei tlâhpipazy:-

1. Gov’t Primary School, Saikao Platinum Jubilee alyna liata avaw hlaopa zydua, anaohna nata zana Samaw ei chahlâ ei.

2. Saikao khih dei châ leipa ta Mararâh châta noh ngiatlâh a châpa Gov’t Primary School, Saikao Platinum Jubilee alyna liata Chief Guest châta nama saiheina nata khokheina ei vaw topa vâta aly kaw na ta, he daihti hmâ thei awpa ta daihti phapa maniah pietuhpa eima Khazohpa hnoh ta alynabie ei reih.

3. Atanoh kô 70 a tlohna noh liana he ta eima Mara Missionary RA. Lorrain nata a lahpinô zy moh rei lei thaipa châ vei; â mo ta Mara A AW B maniah vaw taopa ei ta, maniah ama pachu vâta atanoh he Marasawzy ta he hawhpa duahmo liata eimâ vaw dua theipa a châ; ama chô liata alynabie ei reih hmeiseih.

4. He School â vaw dua tuana daihti liata Teacher hmiatuapazy kha atahmâ he y ei sa la, amâ ly kaw hra nahta eipangiasa. Keimo, atanoh alyna daihti ahlao theipazy pi he eima vâhnei hmeiseihpa ta ei pahno; Khazohpa ta hmo rônah ngaitapa maniah a taopa vâta eimâ ly thai kaw awpa ei khoh ngaita kaw.

5. Atahmâhlâ eima râh duasu eima mopa ta a châ khiah Mara reih he a padâh kaw bâ khiah ma aw tah thei awpa ta a pata lei kaw bâpa ta â lâ; taopathina rai hriana kyh liata Saikao khih liata pachupazy ei chi he nama peimawh kawna tahpa nama pahno heih awpa ei reih chanei khoh kaw.

6. Eima râh liata Mara reih dei châ vei; châ achu tiamapa nata châthaipa eima chyh via lymâpa ma a châ tly; a eih pachaipa ta Saikao khih tawhta châ thaipa ama pua hluh kaw tyhpa tlai; atahmâ deikua châ thaipa nama chyh kaw vâta ma a châ ma, Doctor, MCS nata Competitive Exam Result zy liata Saikao saw amâ hlaopa ta diama ei pahno vei? Tiama nama papua via awpa apeimawh hmeiseih.

7. Mararâh liata Thâtihpha nata Education â vaw thaotôna su Saikao sawzy ei chi he Mararâh thlalâ nama châ; eima râh â sosâh via lymâna awpa liata Saikao liata Teacher zy nama tiama via awpa apeimawh hmeiseihpa a châ.

8. Saikao liata Primary School sâ 5(Sawhkhâ School sâ 3, Awnano School sâ 2) a y haw. School eima hnei hluhpa hawh ta Taopathina rai hriatuhpa Teacher châ khai achhuah ei suh u. A eihpachaipa ta Teacher nahzy he pachuna kyh liata tiama eima papua via heih awpa apeimawh kaw.

9. Teacher zy he phopi paduatuhpa nama châ; pachutuh phapazy ta khitlâh phapa tao ei ta, pachutuhpa pha leipazy deikua cha khitlâh raona atlôkheituhpa dei ama châ. Atahmâ daihti liata Teacher nahzy, eima pachutuh hmiatuapazy hawh ta phahnai ngia kawpa ta hrialasana kyh liata tiama papua chyu awpa ta ei châ ha aw.

10. Atanoh Gov’t Primary School, Saikao Platinum Jubilee he alypa nata thapha kawpa ta hmâ chyu awpa ta khokheina sâh chaipa ei chahlâ ei.

He alyna liana he ta Puhpa K. Hrahmô, EM(i/c Edu), Puhpa K. Siakhai, Adviser to CEM nata Puhpa B. Luaha, MDC, Saikao biatuhpa zy ta biereina chyupa ama hnei chyu hra.

Puhpa K. Hrahmô, EM(i/c Edu), Puhpa K. Siakhai, Adviser to CEM, Puhpa BeiRôkhu Beitâ, I & TO, Puhpa Rakhu Chozah, AE, Puhpa N. Beichakhei, PS to CEM, Puhpa LM. Beingalai, CEO, Puhpa T. Pabua(I & P Staff) nata hlasathaipa Laihsa Jessica B. Khuhly zy ta CEM he ama za zi hra.

(Written by: BeiRôkhu Beitâ, I & TO, MADC).