CEM Puhpa N.Zakhai

Puhpa N.Zakhai, CEM, MADC.

SIAHA, 3 Pachawh(March), Pachynoh(MNN) – Zâhnia târi 2.3.2018, Chutynoh liana kha ta Puhpa N. Zakhai, CEM, MADC cha Siaha District Playground liata “Kut Pa”(Chief Guest) châpa ta Chapchar Kut 2018 cha aly kawpa ta ahmâkhei ei.

Ary liata palâsapa he Puhpa N. Zakhai biereipa(Short Messsage) a châ:-

Mizo “Kut”(Cha-ypi) hry liata rônah chaipa nata eima pasô chaipa Chapchar Kut ahmâ awpa ta avypa zydua, Chibai – Samaw ei cha hlâ ei.

He ‘kut’ ly ychhihpa Chapchat Kut, eima mahnô nata mahpaw daihti tawhta ama vaw hmâ tyhpa, saw matlupa hawh deita ama vaw mokhâh tyhpa nata atahmâ thyutliasawzy chhao ta tlô n’awpa daihti eimâ ngiahtiah leipata a châpa he eima pasô thai kawpa a châpa ta ei pahno. Hlâno eima mahnô nata mahpaw zy kha raihriana chysia chhaota vâsua nohsa hry liata, thlohmia nata chava hry liata mathlai ti chhao ta ama hrona awpa châta akôpi ta vaw hria tyh hra ei sa la, ama pathi palôh lia deikua ngâchhihna, tiamana, veiseih palôh hâhna nata mizo hro ngia ngaitapa amâ vaw vaw pahnie lymâ. Chahawh ta ama daihti ahmâh tyhpa ama châ vâta Chapchar Kut hi ômo châta cha kut sisaw leipa deita châ leipa ta apahâna cha ypi daihti pipa “Awllen” châ pâ hra ta, alypa nata thapha ngaitapa ta ama vaw hmâh tyhpa a châ.

He kutpui châna he ta chhoh to ta âpatohpatia chyu ei ta, a khihpi chhao ta athata amâ patohpatia kaw tyhpa a châ. Nie nata do pahâh chai awpa ta ama pachâpazy chhao ta apie chyu ei ta, sahma nata sa zy dhhao ta, hlasapa nata lâna chô ta aly kawpa ta he kut he ama vaw hmâ tyhpa a châ.

Chatlai chu, Krizyhna chata mo pakha hro nata khitlâh hro zy vaw panano khai ha bâ ta. Khahlâ via no ta eima mahnô nata mahpaw zy ta Chapchar Kut ama hmâna zy chhao pananopa a châ pathao lymâ hra. Anodeikuacha, he he pahno ngâthlâh ei si la, apha kawpa ta ei pahno; mahnô mahpaw daihti liata ama vaw tao tyhpa eima Krizyhna nata ahmie khao leipa riahpha kawpa ta siesai ngâh ei si la. Tiamana, ngâchhihna, adona, veiseih palôh hâhna nata Mizo hro phapa ama hro pha kawpa, ama hro liata khâcharâ abai hapa deikua kha cha keimo thyutlia sawzy he ta cheihchalo lymâ ei suh u. Apha leipazy siesai eima ngâhpa hawh ta aphapazy cha riahpha kawpa ta pahro lymâtuhpa châ awpa he chi khah ei suh u.

He kutpui eima hmâ ngâhaipa he ta eima mahnô mahpaw hniehnôh nata maniah pathlatuh hmiatuapazy ta eima pathi palôh liata su to ei sa la, Chapchat Kut he ta â unawhna, aryhna nata hmahsiena thiehpa maniah tlôkhei tlai mawh sy. Alypa nata thapha kawpa ta he Kutpui he hmâ chyu awpa ta khokheina ei chahlâ chyu ei. Ei châ ly kaw ei.

Puhpa N. Zakhai he a viasanô Pihnô Napaw Hlychho hleikhô ta MADC liata a hrialâhpa Puhpa L. Prisila, EM (i/c Soil etc.), MADC nata IT Wing, MADC tawhta Puhpa Beirôkhu Beitâ, AITO zy ta ama zi hra.

Puhpa N. Zakhai he, daihti thaona tawhta ahmâkheipa ta achhâna taihta ahmâkhei ei ta, Mizoram sawhkhâ ry liata hriapa, he programme apachhuahpanohtuhpa zy ta a chô liata alyna bie ama reih.

(Admin, MNN)

No comments yet... Be the first to leave a reply!

Leave a Reply

You must be logged in to post a comment.