WELCOME ADDRESS IN CONNECTION WITH THE ARRIVAL OF
PU ZODINTLUANGA HON’BLE MINISTER i/c UD & PA, ETC.
GOVENRMENT OF MIZORAM AT SAIHA ON 14.08.2015 (FRIDAY).

Ka pu,

A hmasain nang leh official rawn zuitute zawng zawng “SAMAW” kan hlan a che u. Kumin Saiha District Independence Day lawmna min rawn hmanpui theih dawn avangin i hnenah leh official te hnenah Mara ram mipuite aiawhin lawmthu ka sawi tak meuh a. Tluang taka in rawn thlen theih avang leh in hmel duhawm takte kan hmuh theih avangin kan Lalpa Pathian hnena lawmthu sawi hi kan ba takzet a ni. Mara District–a in rawn zin hi keini Mara ram mipuite chuan thinlung leh tihtak meuhin kan lo lawm a che u.

Mizoram dung leh vang han fan chang hian i hnathawh hlawkzia hi mit ngeiin kan hmu a, thingtlang kilkhawr berah pawn khelmual ṭha tak tak an nei fur hlawm tawh a ni. I hmalakna a zarah Mizoram khawpui Aizawl–ah Stadium changtlung takte kan nei chho zel a, infiamna chi hrang hranga National level intihsiakna hial kan thleng thei ta mai dawn tih kan hriatin i hnena lawmthu sawi hi Zoram mipuiten kan tih makmawh a niin kan hria.

Kan District hmasawn leh zualna tura i hmalaknate hi ropui kan tiin, kan ngai hlu a, kan fak mawlh mawlh ṭhin a che. Kan khawpui Saiha ngeiah thalaite mamawh zawng hriain Indoor Stadium New Colony–ah min sak sak a, hman theih ṭep tawh a min siamsak avangin i chungah kan lawm takzet a ni. Kan District chhunga khaw hran hrana khelmual min laihsak mek leh hmun ṭhenkhata min laih zawhsak tawh avang pawn lawmthu kan hrilh nawn leh a che. Urban Development & Poverty Alleviation Directorate kaltlanga Saiha khawpui chhunga i hmalaknate hi chhuanawm kan tiin, kan khawpui hmel pawh nasa takin a ti mawiin kan hria.

I department enkawlte kaltlanga i hnathawhte a hmun ngeia enchiang thei tura Saiha rawn thlen hma i duh tih kan hria a, hei hian i hnathawh–a i in pekzia leh i thiltih puitlin tir ngei i duh ṭhin zia a tilang chiang em em a ni. Mizoram ṭhalaite tuihalna leh mamawh zawng i hriatthiampui mai bakah, an beiseinate i tihpuitlinsak zel thei hi kan chhuang takzet che a ni. Minister hmingṭha tak leh a ngaihna hre tak kan nei che hi vannei kan in ti a, Mizoram hmasawn zelna turah pawn i lakah beiseina sang tak kan nghat a ni. Saiha Independence Day lawmna–a khuallian tura i lo kal thei hi kan lawm a, he hun hi remchanga hmangin kan District hmasawn leh zualna tur atan hengte hi hma min lakpui turin i khawngaihna kan ngen a che:–

1. I hriat angin kan District hi District hnufual berte zing ami a ni a, Saiha Khawpui hi kawng tinrengah tih hmasawn a ngaih bakah a chhunga retheihnate hi um bo a ngai takzet a ni. Chutiang kawnga hnathawk theitu awmchhun chu UD & PA ani a kan hriat avang leh Directorate UD & PA–a kan lo dil tawh angin UD & PA office puitling Saiha–a min dahsak turin kan ngen tak meuh a che. Chumai bakah Saiha khawpui chhunga UD & PA hmalakna hi min chhunzawmsak zel tur leh a thara Tuipang khua–a hna min thawhsak turin kan ngen bawk a che.

2. Football infiamna–a Zoram ṭhalaite hmasawn theihna tur ngaihtuahin ram changkang zawkte inkhelhna ṭhin “Artificial Turf” District khawpui tina phah a lo ni hi lawmawm kan ti takzet a. Kan District khawpui Saiha–a phah ala ni rih lo erawhchu District dangte awh ana hle. Kan ṭhalaiten District danga ṭhalaite ang bawka khelmual nuam leh ṭha–a an khelh ve theihna turin Saiha–ah Artificial Turf min phahsak thei la kan lawm hle ang.

Ka pu, Mara ram khawpui Saiha–a in cham chhung hian hun ṭha leh hlimawm tak hmang turin ka duhsakna sangber ka hlan che u a, i lawm zawng anga kan lo dawngsawng lo palh che a nih pawhin kan fel lohnate min hriatthiampui turin ka ngen a che. I rawn thlen kan lawmzia hi kan chezia leh ṭawngkamah tilang thiam lo mah ila, kan thinlungah erawh kan lawm takzet a ni tih min hriatsak turin ka ngen a che.

Ka lawm e.

(RT. ZACHONO)
Chief Executive Member
Mara Autonomous District Council
Siaha.