(SIAHA, 23 April, 2018)

Atanoh zâlâ dawh 2:00 PM liata Puhpa V. VB. Byhna, Executive Member(i/c Rural Development etc.), MADC ta a Office Chamber liata Mara Chanô rônahpazy hnoh ta alykheina hneipa ta palyupalih-na nata thopi dokheina a hnei ei.

Palyupalih-na hlâpazy:-

1. Pihnô P. Chaki, President, M.CH.P, District Level Women’s Award 2018 for Women’s Social Activist adaotuhpa.

2. Pihnô M. Chhuady, New Colony, Siaha, Mararâh liata saw sa hluh chaipa. Saw 17(Chanô 12, Chapaw 5).

He achô liata moh rohpazy hnoh ta Puhpa V. VB. Byhnâ ta Ryuchâ(Citation) nata Phusâ Rs.5,000/- raihrie hlâna a hnei chyu ei.

He alykheina/palyupalihna châta Programme chyupa taopa châ ta, Puhpa Pheiki Solo, Sr. RDO ta Chairman châpa ta chhihtha ta, MADC Official lâ tawhta Puhpa BeiRôkhu Beitâ, I & PO chhao hruapa a châna hawh ta â hlao hra.

He Programme liata MTP nata MSO Headquarters liata President nahzy hruapa châ ei ta, MTP Headquarters tawh deikua ahlao thei vei ei.

MJA Siaha zy chhao hruapa ama châna hawh ta ahlao hra ei ta, ama puapha kawpa ta pahnopa a châ.

Puhpa V. VB. Byhna ta alykheina châta hmosai piepa a hlâ khai tawhta bie reina chyupa hnei ta, he Mara nô khochhih kawpazy he âpalaikhei zie reih ta, âmo pa no(2) zy he Mara chanôzy ta amopâ khai awpa ta bietana hnei ta, he hleikhô ta Pihnô Chaki nata Pihnô Chhuady zy ta hmialâ ama siena awpa liata Mara Chanôzy châta apie pasa via lymâ awpa nata tiama papua via lymâ awpa ta khokheina hlâ ei ta, ahawna chhao a tao hra.

MSO Headquarters President Puhpa LD. Vabeihruasa nata Puhpa M. Baithai(MJA) zy chhao biereina chyupa hnei chyu hra ei ta, pasyuna nata thapatlôna biepha kawpazy chhao reina ama hnei hra.

Programme chhâ tawhta nohthlah lana hneipa châ ta, he khai tawhta alykheina Thopi, ahmie pahâh kawpa chhao ta dona hneipa a châ hra.

(Written by BeiRôkhu Beitâ, I & PO, MADC).