Typical village he hlano Marapa zy khihsa na nata hrozie palâsa thei n’awpa pachâpa ta sapa châ ta, Art & Culture Department tawhta pachhuahpano pata phusa hlupi hryuhpata Abei-O 1 nata O hropa 9 sapa a cha.

Khizaw hmahsiena âsâh lymapa hawhta,eima râh marapa râh chhao he hmahsiena lathlôh liata sie lymâ pita, hlano marapa hro nata khihsa tôhtuziezy eima my lymâ habâ, abei-O sa dâhzy nata hlâno marapa O sazie zy chhao my pathao ha pita, tho- O nata khipi viapa su zy liata building phapa zy sai ta sa’pa eima chhuanoh hapa vâta, hlano O sa zie zy cha eima my pathao lyma ha bâ.

Thohtlâh viapa liata a ypa zy chhaota ngiadi-O nata Ngiasarâ-O hmahpata sa hra ei sala, hlano O sazie hawhta châ thai khao hlei vei, design thla khaipa a châ ha bâ.He vâna heta hlâno eima O sa dâh zy pahno thei awpata, Art & Culture Department ta hmah lata he Mara khih Typical Village he apaduapa nata Thyutlia marapa sawzy pahno hra awpa ta ataopa a châ.

He Mara khih Typical Village he ta O sana dei châ leipata hlano marapa zyta chhaichhi hmobao nata noh charei khihsana ta âchakaihpa zydua chhao Mara thyutliazy hmô thei awpata he khih nata suh liana he ta soh awpa nata pahmaoh pasiah chhao âchhuah lyma hra. Myla hânoh liata marapa thyutlia zy ta eima râh thâtih nata khihsana Research zy tao theipa nata atao khohpa zy châ chhao ta, he su ama tly thai nawpa ta nata he su liata hl^ano Marapa chhai chhi zy chhao so lymâ pa châ aw ta, he Mara Khih avaihtuh awpa chhao he a chatliena lâta so awpa ta hmah la ngâpa a châ.

He Typical Village tawhna he ta, hlâno Marapa khihsana nata chhaichhi zy eimanie tluana chi zydua chhao hmôthei awpa ta, so khaipa châ aw ta, sôkhao Sôkhai zy beiphia chhona chhaichhizy nata eima nie tluana chhai chhizy nata marapa hmobao zydua paki pata he su liana he ta paso khai awpa ta hmahla lymâ awpa chhao a chhua noh haipa a châ.

He khi he Zyhno râh Chedô Lômathu tlâh liata a ypa châ ta, asu nata a y ziana chhao he aryh kawh ta, he su eima tlô pata nata palôh liata a y tuachaipa cha hlano eima khihsazie ngiaryh âchhihzie, khihsana kyh liata palôh amâ raoh zie zy nata ama hrozie awpazy chhao âsai palie thei khaipa a châ.

He châna he ta central lâ hiapa châ ta, Special Central Assistance sôh hmôpa tawhta, he ozy he paduapa a châ. He Typical Village padua nawpa he ta Zyhno Khih he buakhei via awpa ta a hawpa châ ei ta, Managing Board paduapa chhao a châ hra. Chazy cha :-

1. Chairman :- Puhpa M. Hmoke
2.Secretary :- Puhpa VT. Sachhua
2. Members :- Puhpa VT. Lysa, S. Chhochai, TT. Pawla, M. Hneisa, L. Leimo, VCP. L. Chhuakhu, VCP. ST. Selua, VCP.

Ahyrai ta Art &Culture Dept. MADC ta yzie hnei kawpata ahmahlana he aparao-pakeinazie ta hria leipata, apabohsanazie ta eima hrâkyu chyu awpata eimâ haw hmeiseih. Marapa hmo chhaichhi chhao he hlâ (donate) thei chyu sihla, alypa achâ kaw aw.