PRESS RELEASE
NO.27/2024

LOMASU, 5 Pamih, 2024, Hriaheinoh – Lomasu khih liata M. Zawtha (L) nata M. Marapawnô (L) zy Memorial Lobo atheithlâhna Programme pachhuapanohpa liata Puhpa M. Laikaw, Hon’ble CEM, MADC ta atamy kha Chief Guest châpa ta programme a hmâkhei ei.

He Memorial Lobo atheithlâhna Tournament taopa liata chapaw châta Football, chanô châta Volleyball ataopasuana pachhuapanohpa a châ.

He daihti liata Puhpa M. Laikaw, Hon’ble CEM, MADC ta biereina daihti chyupa hmâh ta, Sports Discipline nano nanopa liata tiama ngâsapa ta nata achhuahna hneipa ta eima talent zy he hmâ phahnai awpa a byuh zie reih ta, “hlâno daihti liata cha Tournament zy he thyutliapazy atudaina nata buana ta vaw hmâh tyh ei ta, hmahsiena rai y vei. Keimo chhâ liata thyutliapazy pi deikua, eima pachâna (mindset) thlapa ta azaohna (competition) pathaihpa ta eima talent zy hmâ achhuah si la, District level liatazy, State level liatazy nata National level liazy taihta alâ pha awpa ta eimâ chhuah awpa a byuh hmeiseih. Marasawzy ta eima thei cheingei aw; chi hropazy ama theipa cha eima thei lei nawpa y vei.”

“He Tournament he ta Mararâh notla kao thyutliapazy paritheipa adyuhna chhaichhi pha kawpa miakha ta vaw châ sala, eima talent hnei phapazy he hmâ tlâh châ awpa ta palôh hmeiseihpa ta achhuah chyu ei suh u. Atanoh tawhta thyutliapa pari theipa sei liata a ypazy pi, siesai ngâhpa ta eima thyudyuna daihti he hmo phapa taona châ ta sie bâ suh vy.”

“Biatuhpa ei châna hawhta hmialâ daihti lia chhao ta Sports Tournament zy he thyutliapazy châta tao lymâ eimâ chhuah aw. Phura Zone Sports Meet chhao tao cheingei awpa ta pachhuapanohna siekhei ngâhaipa a châ” tahpa reih ta, Tournament a vaw hlaopa thyutliapazy hnoh ta pasyuna bie pha kawpa reih ta, he tournament he apalâ kawpa ta patlôpa a châ thei nawpa ta khokheina bie a reih.

He Memorial Tournament he MDC Tokalo Bia (Constituency) ôna chhôh liata khih ypa –Tokalo, Bymari, Lomasu nata Lodaw zy châta taopa châ ta, Kiasie nata Maisa zy hrua pâpa ama châ.

ISSUED BY:
Information & Publicity Department
Mara Autonomous District Council
Siaha.