(6 July, 2018, Friday)

Atanoh liana kha ta Puhpa K. Chhuabei, EM (i/c PWD etc.), ta MADC Sub-Headquarters: Tipa khih liata Revenue Office sa ngâhaipa a tly.

PWD Department ry liata mohôhpa Revenue Office, sa ngâhaipa he a portfolio a châna hawh ta 98% sa patlô hapa a châ tahpa bie a daopa cha a su liata mopasiana hneipa ta, thlai pahy thei awpa a châ zie a hmô hra.

Atahmâ he abâ(wall) rôh hnia ngâhaipa châ ta, Toilet liata hmâ awpa Tipâh(water tank) sona awpa chhao tao patlôpa a châ khai tawhta pahy thei awpa hnabeiseihpa châ ta, atakô September liata cha pahy thei awpa ta hnabeiseihpa ta hma lana siekhei ngâhaipa a châ.

He Revenue Office tlyna a hnei khai tawhta Siatlai khihparoh kiahpâh liata Rs.16.00 Crore(Lakh 1,600/-) ta sa ngâhaipa “Ekalavya Model Residential School” (EMRS) chhao a tly hra.

EMRS he Acre 20 tlai ta arâh kawhpa châ ta, Government of India Scheme hawhta ta a O chhao sa lymâpa a châ. Atahmâ he Building sâ 14 tlai sa ngâhaipa châ ta, NECS nahzy ta a rai he ama hria.

Puhpa Chhuabei chata reih ta, he School avaw y theina awpa ta a sana awpa châta râh he asaipa tlai ta pie abyuh ta, he râh he Environment & Forest Department lâ liata Clearance tao abyuh vâta thata hmah a vaw la zie reih ta, ano hmah lana zawhzi ta râh he donate awpa ta paryhsapa a châ vâta he School he a pachâ peimawh zie a reih.

He EMRS tlyna liata Satlia Joel(New Laty) cha J.E châpa ta vaw deichhy ta, Construction ama siekheina dâh report zy a pie hra. Arâh leilô saw cheingei ta J.E châpa ta mohôhna rai a hriapa cha Puhpa Chhuabei ta aly kaw ta, mohôhna kyh liata tiama papua via lymâ awpa ta khokheina chhao a hlâ hra.

He Scheme he Scheduled Tribe student zy châta India sawhkhâ ta a taopa châ ta, Mizoram liata sâ 3 y hai ta, ADC area liata sâkha sai sa ngâhaipa a châ hra.

He liata a kiah awpa Student zy cha admission mâ taihta chei byuh leipa ta, asaipa tlai ta ama kiah awpa hleikhô ta asaipa ta Hostel liata y aw ei ta, sawhkhâ tawhta thlachareih ta stipend Rs.3,200/- chhaichhyh ama dao pâ aw.

Admission deikua Entrance nata Test siepahlie awpa a châ.

Tipa liata sa ngâ haipa he Student 300 hlei atlôh awpa châ ta, seat he chanô nata chapaw â lyu raihriepa ta tao awpa achâ hra.

He hawhpa Residential School he y tlâ mâh leipa ta; School hawtizy ngâlâh dei châ leipa ta Campus liata Principal nata Teacher zy chhao ama y pâ khai awpa a châ.

NECS Company he ta raihriaana kyh liata phahnai ngiah kaw ei ta, atahmâ he chyhsa 40-60 chhaihchhyh ta O sana rai he ama hria ngâhai. Puhpa Chhuabei chata a pachâpa hlâta rai hmah a sie via tahpa ta a reih hra.

EMRS he kô 2017 liata sa pathaopa châ ta, kô 2019 liata sa patlô awpa tahpa a châ hra.

Puhpa Chhuabei he MADC tawhta Puhpa Pawbi Chozah, AE(PWD), Puhpa C. Beichhua, JE(PWD), Puhpa Beirôkhu Beitâ, AITO zy ta zi ei ta, MJA lâ tawhta Puhpa Jeffrey Khara, Editor, Moonlight ta zazi hra ta, MDCC lâ tawhta Media Secretary Puhpa C. Lalengliana ta a zazi hra. Tipâ tawhta Puhpa HC. Lalawmpuia, DAO(Tipa) hleikhô ta khitlâh nopaw VC Member zy chhao ama zi hra.

(Written by: BeiRôkhu Beitâ, AITO, MADC).

No comments yet... Be the first to leave a reply!

Leave a Reply

You must be logged in to post a comment.