SIAHA, 25 May, 2018 (MNN) – Atanoh chutyh my dawh 10:45 AM liata Puhpa N. Zakhai, CEM, MADC ta Siaha liata Apex Bank Branch eima hnei chhôhpa, Council Vaih liatahpa ATM thiehpa cha Pahyna a hnei.

He ATM he English nata Mizo ta taopa châ ta, English athai leipazy chhao ta Mizo reih ta hmâ theipa a châ.

ATM Pahyna Programme chyupa hmâpa châ ta, he liata Puhpa N. Zakhai ta biereina chyupa a hnei. A biereipa thokhazy:-

1. Atanoh liata Apex Bank ATM pahyna thei awpa ta daihti phapa nata tlâh-na nâ pietuhpa Khazohpa hnoh ta alynabie reih na ta, he hawh ta ATM pahy awpa ta nohâh nâtaotuhpa Apex Bank Manager nata a hrialâhpazy hnoh ta alynabie ei reih.

2. Siaha District zawpizy ta Bank liata eima sôh hneipazy rainao kawpa ta Draw theina awpa ATM he peimawh hmeiseih pi ta, MADC sawhkhâ hleikhô ta NGO zy chhao ta hmah thata vaw lah ha pi ta, atahmâ he hawh ta hlaotloh-na eima vaw hmô theipa eimâ ly hmeiseih.

3. He hawhta hlaotloh-na eima vaw hmô chhâpa he Apex Bank, Siaha liata hriapazy hmah-lana vâ achâ tah leitheipa châ lei ta, ama chô liata alynabie ei reih.

4. He ATM thiehpa he Mizo reih chhao ta hmâ(operate) thei awpa a châ vâta Siaha District zawpizy ta eima hmâ hluh chaipa a châ nahta hnabeiseihpa a châna hawh ta eima hmâ phahnai kaw nahta ei pangiasa.

5. Apex Bank vâta Private O Concrete building a hneipa hluhpi y pi ta, Achhyna O châta Loan hluhpi alapa eima y hra. Apex Bank he ta Siaha District châta byhnâ maniah a châpa kaw tahpa he eima phanopasia.

6. Wedding, Christmas Bazar nata Lôbô châ zy ta Personal Loan zy Apex bank tawhta lah tyhpi ta, KCC loan zy taihta eima râh ta eima hmâ phahnai lymâ.

7. He Bank ATM he Siaha District zawpizy ta hmâ phahnai chyu awpa ta khokheina eicha hlâ ei.

MADC Official lâ tawhta Puhpa V. Zacho, Executive Secretary, Puhpa JH. Beihnai, ARCS nata Puhpa BeiRôkhu Beitâ, AITO zy ta Puhpa N. Zakhai he ama zi hra.

NGO lâ tawhta Pihnô P. Châki, President, MCHP(H) nata Puhpa PP. Zalena, President, MTP(H) zy chhao ahlao ei ta, MJA Siaha zy chhao ama puapha kaw.

Puhpa V. Zachon, Pihnô Chaki nata Puhpa JH. Beihnai zy ta biereina chyupa ama hnei hra.

Pahyna Programme chhâ tawhta Puhpa V. Zacho ta ATM he hmâh tuachaipa ta phusâ chhao a la(draw) pâ hra.

Apex Bank, Siaha Branch he târi 23 October, 1986 liata paduapa châ ta, atahmâ he Internet hmâpa ta phusâ a transfer thei ta, ATM Card chhao hmâ pathaopa châ ta, RUPAY company siepahliepa ta Internet Banking he tao thei awpa taopa a châ.

Apex Bank liata ATM Card ahnei mâhleipazy châta atahmâ tawhta pataosa theipa châ lymâ ta, Apex Bank, Siaha Branch liata Account ahneipazy châta Application form pabiepa ta ATM Card he hia theipa a châ.

(Written by BeiRôkhu Beitâ, AITO, MADC)

No comments yet... Be the first to leave a reply!

Leave a Reply

You must be logged in to post a comment.