SIAHA, 10 Patô, 2023, Pakhynoh – Atamy myrâh kha ta MADC ry liata Sports Department to tuhpa Puhpa T. Seido, Executive Member nata MTP General (Gen.) Headquarters (HQ) zy ta Siahatlâh liata Playground pakawh ngâhaipa ama mohpasia.

He Playground pakawh ngâhaipa he Special Assistance to States for Capital Investment (SASCI) Scheme liatahpa châ ta, Standard Field châta chhia chiehpa, a tawtaw hapa vâta pakawhpa, pahnai viana (lowering) rai hria haipa châ ta, 60 x 70 meter kawh awpa châ ta, estimated amount he Rs.35.00 lakhs a châ.

Atahmâ he patlô daihmâ hapa hmah châ sala, MADC Sports Department nata MTP zy ta District Field awpa, apha kawpa ta patlôpa nawpa ta kho akhi leina nata ama khodâh hawhta Contractor zy nata reipahmaohpa ta, Plan & Estimate hawhta Measurement zy lapa ta ama mokhei hra.

He Field mopasiana liata Siahatlâh biatuhpa MDC Puhpa HC. Biakcheuva, Puhpa S. Pawkhai, SDO, PWD, Siaha, Puhpa JH. Beihnai, Sports & Youth Officer, MADC, MTP Gen. HQ leaders nata MTP Siahatlâh Branch leader zy chhao amâ hlao hra.