BML, MADC pachhuahpanohpa ta Seminar hneipa a châ

SIAHA, 16 Phiata, 2020 – Atanoh dawh 10:30 Am pa ta pathaopa ta noh 1 chhôh ôpa “Seminar on MARA LITERATURE” cha Environment & Forest Department’s Conference Hall, MADC Complex liata hneipa a châ.

He Seminar he Board of Mara Literature(BML), MADC ta a pachhuahpanohpa châ ta, Mara Biehrai Mopathina siekhei ngâhaipa liata Mara reih hmâzie nata kho akhi leinazy reipahmaoh awpa nata khoziezy thyu nawpa daihti châta taopa a châ.

Chhaih (Session) ei 2 lâta pachhaihpa châ ta, chhaih 1-na liata Puhpa K. Hrahmô, Chairman, BML nata EM i/c Education etc. ta chhihtha ta, chhaih 2-na liata Puhpa Laicho Nôtlia, Vice Chairman, BML ta a chhihtha.

Daihti thaona liata Revd. Thylua Hlychho ta Khazohpa lâ pavaosana hnei ta, Puhpa K. Vanlalliana, Secretary, BML nata Sr. Education Officer, MADC ta report chyupa pie ta, Laihsa S. Carosthene ta mo pakha hlasana a hnei hra.

He Seminar liata Resource person châta Rev. Dr. Laiu Fachhai Chief Translator, Mara Biehrai raopa châ ta, ano ta MARA BIEHRAI MOPATHINA EI NONA SIEKHEIZIE tahpa châbu tho 49 a ypa tawhta Mara Biehrai Mopathina ei nona Committee Member zy ta ama pahruapa nata ama report zy reipasiana nata rei papuana ahnei.

Atanoh Seminar he daihti ta â daih lei vâta Phiapi thlâpâ daihti ryhpaohpa liata hnei hnei heih awpa ta ryhraona tao awpa ta paryhsapa a châ.

He Seminar liata hrua-eihpa zy hleikhô ta ECM & CCI(M) Headquarters nôpawpazy hrua khaipa châ ei ta, Mara Literature liata apahâh viapazy chhao phahnai ngiah kawpa ta amâ hlao chyu hra.

Atanoh liata Seminar hneipa liata “Mara reih cha he hawhta hmâ awpa a châ” tahpa biechhâna taopa y hlei leipa ta, pahruana nata khozie reina daihti châta hmâpa a châ.

Pahruana athyu khohpazy cha khatino rai thyu theipa a châ hra tahpa Puhpa Laicho Nôtlia, Chairman ta reih ta, atanoh liata Seminar avaw hlaopa zydua hnoh ta BML, MADC moh ta alynabie a reih hra.

ISSUED BY:-
Information & Public Relations Department
Mara Autonomous District Council
Siaha.