MARASAWZY HMAHLANA NATA ALYNA BIE

Posted by on April 7, 2020

NO.MADC/CEM/PB/PR.2020/02
CHIEF EXECUTIVE MEMBER’S PERSONAL BRANCH
MARA AUTONOMOUS DISTRICT COUNCIL : SIAHA.

Dated Siaha, the 6th April, 2020

MARASAWZY HMAHLANA NATA ALYNA BIE

                    Tahmahlâ eima râh lia dei châ leipa ta khizaw ta abuakhei haipa Pasana hri chi chhihpa Novel Coronavirus (Covid – 19) tawhta avai awpa apeimawhpa vâta Janata curfew, Lockdown – zy phuahpa châ ta; alei theileipa nata apeimawh leipa ta ahy hmâh pua-ei khao leipa ta Office chhao khaw khaipa a châ. He kyh liata Mara râh zawpizy ta pahno thaipa nata rei ngiapa ta Sawhkhâ dâh nata phôh eima zyh pha kawpa ta alâ ta, Sawhkhâ nata NGO – zy hria paraohna chhao pha ta, aly â chhih ngaita.

                     He Covid – 19 adyuhna kyh liata bao angiahpazy deichhy n’awpa châta MADC ry liata ahriatuhpa zydua ama Thla kha (March 2020) hlao tawhta 3 % chyu thyupa ta CEM’s Relief Fund liata sopa a châ. Chadei châ leipa ta he Pasana hri adyuhna kyh liata ama theinazy papua lymâpa ta CEM’s Relief Fund (MADC) châta pasai kawpa ta Mara Chanô Py Gen.Hqrs. ta Rs.20,000/- (Tlaw Thyno), CCIM Hqrs.Saikao ta Rs.10,000/- (Tlaw Thy kha) nata Federation of MADC Employees – zy ta Rs.1,00,000/- (Tlaw Thysy kha) vaw hlâ hra ei ta, Hon’ble Chief Executive Member, MADC nata ahrialâhpazy ta palôh hmeiseihpa ta amâ ly ngaita.

                     Pahno chyupa hawhta CEM’s Relief Fund (MADC) he Budget liata ahlao leipa, veiseihpazy thyu pakhypa tlao a châ. Chatana chata bao angiahpa nata hmo peimawh kawpa lia tlaita  hmâh tyhpa a châ. Chavâta nama veiseihna nata saiheinazy he CEM’s Relief Fund heta angiah ta, apeimawh ngaitapa a châ.

                     Marasawzy rairuna mokhei ta pathlâ lymâ awpa ta MADC chhao ta anah khâ pachôh ta, eima District liata Sawhkhâ Official – hropazy, NGO, State nata Central sawhkhâzy chhao asaohiah lymâ pa ta a theina zydua apapua hai hra. Bao angiahpa nata deichhy angiahpazy chhao mokhei lymâ ta, thlai ta pathlâ khei lymâ awpa he khatino raita âpachy ta, a hria lymâ hrapa a châ.

          Covid-19 adyuhna châta MADC hmahlana tlâhpi viapazy  cha:

  1. Sawhkhâ bie hawh ta Total Lockdown apha kawpa ta zyhpa ta MADC chhao Office khawpa châ ta; alei theileipa ta Office raihria awpazy châta Office tly hmia liata Ku sina pha kawpa pachhuahpanohpa a châ.
  2. Siaha District liata District Task Force on Covid-19 Outbreak Committee â duapa pahnopa a châ tawhta abyuhna nata angiahna liata hmâ awpa ta Rs.1,00,000/- (Tlaw Thysy kha) cha Puhpa Bhupesh Chaudhary, Chairman & Deputy Commissioner, District Task Force Committee – hnoh ta thlai piepa a châ.
  3. Covid – 19 adyuhna kyh vâta rairupa nata deichhy angiahpazy bao n’awpa châta zawpi maluh mopâ pa ta, Biatuhpa MDC – zy siepahliepa ta MADC Area chhôh liata Village Level Task Force – zy hnoh ta Rs. 80,000 – 1,00,000 /-  chyu hlâpa a châ.
  4. Siahatlâh liata MDC Hostel cha Quarantine n’awpa su châta pasai ngaitapa ta pahmâsa chypa a châ.
  5. Covid -19 adyuhna kyh liata bao angiahpazy deichhy n’awpa châta MADC ry liata ahriatuhpa zydua ama Thla kha (March 2020) hlao tawhta 3 % chyu thyupa ta CEM’s Relief Fund liata sopa a châ.
  6. MADC Drivers’ Association ta Covid-19 adyuhna châta MTP Gen.Hqrs. hnoh ta Rs.10,000/- (Tlaw Thy kha) a hlâ.
  7. MADC Officers’ Association ta apeimawhpa nata angiahpazy châta Rs.1,00,000/-  (Tlaw Thysy kha) MTP Gen.Hqrs hnohta a hlâ hra.
  8. Eima râh liata Py peimawhpa nata laichaipazy ta Covid – 19 adyuhna kyh liata rairuna nata abyuhna hawhta ama hmâ awpa ta MTP Gen.Hqrs. hnohta Rs.3,00,000/- (Tlaw Thysy thôh)  pie châ ta, MSO Gen.Hqrs. hnoh chhao ta Rs.1,00,000/- (Tlaw Thysy kha) piepa a châ hra.
  9. Mara râh liata rairuna chi nano nanopazy mokhei lymâpa châ ta, International Border–liata khi thokha he; Chapi, Siasi, Lôbô,   Kaochao East, Lôpu nata Khaikhy – zy ta Covid –19 adyuhna kyh liata abyuhna liata hmâ awpa ta Rs.10,000/- (Tlaw Thy kha) chyu        hlâpa a châ.
  10. Local Administration Department, MADC ta pathaihna kyh liata apha kawpa ta hmah ala pazao lymâ.

                     Chadei châ leipa ta NGO, Political party nata mo pakha veiseihpazy ta ama chheipâh nata O hri lyupazy rairuna amo khei chyupa ta, Village Level Task Forces, District Level Task Force, PM CARES Fund nata Prime Minister Relief Fund – taih chhao ta baona ahlâpa hluhpi Marasaw tawhta y ei ta; he heta India ti nata râh phapa eima châzie chhao palâsa ta,  aly âchhih ngaita.

                     Novel Coronavirus (Covid-19) adyuhna kyh liata abyuhna nata ângiahna hawhta eima zydua ta hria paraohpa ta hmah eima la chyu awpa nata eima baokhâchyu awpa he peimawh ta, MADC chhaota rairuna atyhpazy châta deichhyna rai hria awpa ta atheina hawhta â pchhuahpanoh lymâ hra.

____________________________________________________________ Issued By CEM’s Personal Branch on behalf of Hon’ble Chief Executive Member, MADC, Siaha