PRESS RELEASE No. 30/2019

Puhpa N. Zakhai, CEM ta Gov’t HSS Week Closing Function cum Fresher Social hmâkhei

SIAHA, 23 Thlazoh, 2019,  Chutyhnoh – Atanoh dawh 11:00 AM liata Puhpa N. Zakhai, CEM, MADC ta atakô Government Higher Secondary School(HSS), Siaha Week Closing Function cum Fresher Social, 2019 Programme amâ hmâna liata khichhai laipa (Chief Guest) châpa ta he programme he a hmâkhei ei.

He Week Closing Function cum Fresher Social Programme he Puhpa C. Rodinliana, Chairman, School Week Committee ta chhihtha ta,  Puhpa N. Zakhai ta biereina chyupa hnei ta, kô 1970 – 75 pa liata he Government School liata a vaw kiah ha hrapa thâtih reih ta, a palôh â lie zie chhao a reih.

Student châ no ta tiama peimawhnazie reih ta, he tawhta VIP (Very Important Person) châ awpah nama khoh khiahta la atahmâ tawhta namâ chuna liata tiama nama papua awpah abyuh tahpa ta Siku hawtizy a pasyu ei. “Kei he châ athaipa la châ va na, anodeikua la tiama kawpa ta akaw chu hualua laih na ta, Khazohpa ngiachhiena vâta ei hlao vaw tloh laih ta, Chief Executive Member (CEM) zy ei vaw châ theipa a vaw châ. Rietheina he excuse ta hmâh awpah châ leipa ta, riethei kawna chôta khâchâ tiama nama papua khiahta la hlaotlohna nama hmô pyly aw” tahpa ta achuhaipa siku hawtizy pasyuna bie a hlâ ei.

Siku hawti châ no nata hnatlâna phapa (Good health) hnei peimawhzie reih ta, hnatlâna phapa nama hnei vei khiahta la châ namâ chuna liata concentrate thei leip’aw ei chi ta, hlaotlohna chhao y thei hr’aw vei. Cha hnaihta namâ mohôh pha kaw awpah byuh ta, hnatlâna phapa nata tiamana he nama pachâ peimawh kaw awpah a byuh tahpa ta siku hawti nahzy a pasyu ei.

Atahmâhlâ eima Siaha Khihpi chhôh lia heta Paritheipa ataopazy, HIV pasana ahneipazy, etc hluh kaw ei ta, cha hnaihta nâmo siku hawhti nah namâ sohsi kaw awpah a byuh. Thotlâh lâ tawhta Siaha khihpi vaw pangai ta châ achupazy Nô nata Paw mohmô leina liata ama ypa vâta chhoru hmo ataopa hluhpi y ei ta, nâmo, he school liata akiahpazy cha hawhta y lei awpah ta ei cha pasyu ei tahpa ta pasyuna bie a reih pâ heih hra.

India râh liata Population lâ tawhta thliepa ta Siaha District he HIV pasana a hneipa hluh chaipa nata paritheipa atao hluh chaipa châ pi ta, noza achhih kaw ta, cha hnaihta nâmo achuhaipazy deikua la Nô nata Paw reingiah ta chhoru hmo tao tlâ leipa ta tiama kawpa nata amohôh pha kawpa ta, chyhsa pitloh kawpa nata Siaha District châta Chyhsa hmâtlâh châ awpah ta namâ chhuah chyu awpah a châ tahpa ta khokheina chhao ta pasyuna bie a reih.

Issued by:
Information & Publicity Officer
Mara Autonomous District Council
Siaha.